الاستعباد الأبوي

جميل جداً يكون دينك المفروض انه بيرفض الاستعباد بينما انت عايش اصلاً في بلد حتي معاملتك مع الوالدين بتكون بإستعباد، حقيقي شئ عظيم ان حد عشان مجرد جابك للدنيا دي له الحق انه يتحكم في كل شئ، انا بس كنت عايزه أقول ان مش معني انك جبتني للدنيا دي ده معناه اني مبسوطة، وده برضه مش معناه انه لازم يتحكم فيا ويكون كل شئ بشكل استعبادي، رسالتي واضحة " مش معني انك خلفتني، لك حق تستعبدني" 

الخوف

كلنا في شئ بنخاف منه، الظلام، الأصوات، الميتين، أنواع حشرات، البني أدمين، أنواع حيوانات، الموت،،العفاريت، الأفلام المرعبة، ألخ

انا تقريباً كنت بخاف من كل حاجه في يوم، لحد ما أختي اتولدت وكان عندي في الوقت ده ١٠ سنين، بعدها بقيت مبخافش من اي حاجه مهما كانت، كنت بروح الترب بليل، شوفت ميتين سواء مقتول او موته عادية، بحب شئ اسمه "الظلام الدامس" عندي اعتقاد اني لو بقيت في ظلام هفضل كده عطول وهموت وتنتهي الحياة، بقيت بقدس شئ اسمه الموت، بقيت بحب شئ اسمه "الجلوس مستفرد بنفسي" مفيش شئ يقدر يخليني أخاف، تقريباً مش ده الشعور الوحيد الي اختفي من عندي، في حاجات تانية اختفت من شخصيتي، زي الشعور بالحياء واني متكلمش واستني حد يتكلم بدالي، الحب، وأخيراً وليس آخراً الفضول